ભારતીય મહિલા ક્રિકેટ ટીમે પોતાનું શાનદાર પ્રદર્શન ચાલુ રાખતા ત્રીજી T20 આંતરરાષ્ટ્રીય મેચમાં શ્રીલંકાને 8 વિકેટથી કારમો પરાજય આપ્યો છે. આ જીત સાથે જ ભારતે પાંચ મેચની શ્રેણીમાં 3-0ની અજેય સરસાઈ મેળવીને શ્રેણી પોતાના નામે કરી લીધી છે. તિરુવનંતપુરમમાં રમાયેલી આ મેચમાં ટોસ જીતીને પ્રથમ બેટિંગ કરવા ઉતરેલી શ્રીલંકાની ટીમ ભારતીય બોલરો સામે લાચાર દેખાઈ હતી. શ્રીલંકાએ 20 ઓવરમાં 7 વિકેટ ગુમાવીને માત્ર 112 રન બનાવ્યા હતા. ભારત તરફથી રેણુકા સિંહ ઠાકુરે તરખાટ મચાવતા 4 વિકેટ, જ્યારે દીપ્તિ શર્માએ 3 વિકેટ ઝડપી હતી. 113 રનનો પીછો કરવા ઉતરેલી ભારતીય ટીમ માટે ઓપનર શેફાલી વર્માએ આક્રમક વલણ અપનાવ્યું હતું. શેફાલીએ માત્ર 42 બોલમાં અણનમ 89 રન ફટકારીને શ્રીલંકન બોલરોને લાચાર કરી દીધા હતા. ભારતે માત્ર 13.2 ઓવરમાં લક્ષ્યાંક હાંસલ કરી લીધો હતો. શાનદાર બોલિંગ પ્રદર્શન બદલ રેણુકા સિંહને ‘પ્લેયર ઓફ ધ મેચ’ જાહેર કરવામાં આવી હતી.