ભારતીય મહિલા ક્રિકેટ ટીમે શ્રીલંકા સામેની પાંચ મેચોની T20 આંતરરાષ્ટ્રીય શ્રેણીમાં ધમાકેદાર શરૂઆત કરી છે. વિશાખાપટ્ટનમ ખાતે રમાયેલી પ્રથમ મેચમાં ભારતે પ્રવાસી શ્રીલંકાની ટીમને 8 વિકેટે પરાજય આપી શ્રેણીમાં 1-0 થી સરસાઈ મેળવી લીધી છે.

શ્રીલંકા દ્વારા આપવામાં આવેલા 122 રનના લક્ષ્યાંકનો પીછો કરતા ભારતીય બેટ્સમેનોએ આક્રમક વલણ અપનાવ્યું હતું. ખાસ કરીને જેમીમા રોડ્રિગ્સે માત્ર 44 બોલમાં અણનમ 69 રનની તોફાની ઇનિંગ રમી ભારતને માત્ર 14.4 ઓવરમાં જ જીત અપાવી દીધી હતી. તેના આ શાનદાર પ્રદર્શન બદલ તેને ‘પ્લેયર ઓફ ધ મેચ’ જાહેર કરવામાં આવી હતી.

શ્રીલંકાનો સાધારણ સ્કોર

આ અગાઉ, ભારતે ટોસ જીતીને પ્રથમ બોલિંગ કરવાનો નિર્ણય લીધો હતો. ભારતીય બોલરોએ શિસ્તબદ્ધ બોલિંગ કરતા શ્રીલંકાને નિર્ધારિત 20 ઓવરમાં 6 વિકેટે 121 રન પર મર્યાદિત રાખ્યું હતું. શ્રેણીની બીજી T20 મેચ 23 ડિસેમ્બરે વિશાખાપટ્ટનમમાં જ રમાશે. ત્યારબાદ બાકીની અંતિમ ત્રણ મેચો તિરુવનંતપુરમમાં રમાવાની છે.