મુખ્યમંત્રી ભૂપેન્દ્ર પટેલે ગુજરાતના ગિફ્ટ સિટી (GIFT City) ખાતે દેશના સૌપ્રથમ ભારતીય કૃત્રિમ બુદ્ધિમત્તા સંશોધન સંગઠન (IAIRO) ની સ્થાપનાને સૈદ્ધાંતિક મંજૂરી આપી દીધી છે. આ પ્રોજેક્ટ રાજ્ય સરકાર, કેન્દ્ર સરકાર અને ઇન્ડિયન ફાર્માસ્યુટિકલ એલાયન્સ (IPA) વચ્ચેના ત્રિપક્ષીય સહયોગ અને PPP મોડલ પર આધારિત હશે. આ મહત્વકાંક્ષી સંગઠન આગામી 1 જાન્યુઆરીથી કાર્યરત થવાની સંભાવના છે. IAIRO નો મુખ્ય ઉદ્દેશ્ય અદ્યતન AI (આર્ટિફિશિયલ ઇન્ટેલિજન્સ) સંશોધન અને વિકાસને પ્રોત્સાહન આપવાનો છે. આ સંસ્થા AI આધારિત નવા ઉત્પાદનો વિકસાવવા તેમજ શૈક્ષણિક સંસ્થાઓ, ઉદ્યોગો, સ્ટાર્ટઅપ્સ અને સરકાર વચ્ચે મજબૂત કડી તરીકે કામ કરશે. તે આધુનિક ટેકનોલોજીના ક્ષેત્રમાં ભારતની આત્મનિર્ભરતાને વેગ આપશે. આ પહેલ દ્વારા ભવિષ્યનું કુશળ માનવ સંસાધન (Human Resource) તૈયાર થશે, જે ભારતને AI ક્ષેત્રે વૈશ્વિક નેતા તરીકે પ્રસ્થાપિત કરશે.