ભારતના આગામી કેન્દ્રીય બજેટ 2026-27ની તૈયારીઓ તેજ બની ગઈ છે. પ્રધાનમંત્રી નરેન્દ્ર મોદીએ આજે નવી દિલ્હીમાં નીતિ આયોગ ખાતે દેશના નામી અર્થશાસ્ત્રીઓ અને વિવિધ ક્ષેત્રના અર્થશાસ્ત્રીઓ સાથે એક ઉચ્ચ સ્તરીય બેઠક યોજી હતી. આ સંવાદનો મુખ્ય હેતુ દેશની આર્થિક ગતિને વેગ આપવા માટે નિષ્ણાતોના મંતવ્યો અને સૂચનો મેળવવાનો હતો.

વિકાસ અને આર્થિક સ્થિરતા પર ભાર

આ બેઠકમાં દેશની વર્તમાન આર્થિક સ્થિતિ અને ભવિષ્યની પ્રાથમિકતાઓ પર ગહન ચર્ચા કરવામાં આવી હતી. PM મોદીએ આર્થિક વિકાસને વધુ મજબૂત કરવા, મેક્રો ઇકોનોમિક સ્થિરતા જાળવી રાખવા અને વૈશ્વિક સ્તરે ઉભરતા આર્થિક પડકારોનો સામનો કરવા માટે જરૂરી સુધારા અંગે નિષ્ણાતોના મૂલ્યાંકન માંગ્યા હતા. બેઠકમાં માત્ર અર્થશાસ્ત્રીઓ જ નહીં, પણ ક્ષેત્રીય નિકાસકારોએ પણ હાજરી આપી હતી. તેમણે ભારતીય ઉત્પાદનોને વૈશ્વિક બજારમાં વધુ સ્પર્ધાત્મક બનાવવા અને રોજગારીની નવી તકો ઉભી કરવા માટે પોતાના મહત્વના સૂચનો રજૂ કર્યા હતા. નિષ્ણાતો માટે આ એક એવું મંચ સાબિત થયું જ્યાં તેઓ સીધા પ્રધાનમંત્રી સમક્ષ પોતાની આર્થિક રણનીતિઓ રજૂ કરી શક્યા. આ બેઠકમાં થયેલી ચર્ચાઓ આગામી બજેટની રૂપરેખા તૈયાર કરવામાં મહત્વની ભૂમિકા ભજવશે. સરકારનું ધ્યાન ટકાઉ વિકાસ અને આર્થિક સુધારા પર કેન્દ્રિત છે, જેથી ભારત વિશ્વની ત્રીજી સૌથી મોટી અર્થવ્યવસ્થા બનવા તરફ ઝડપથી આગળ વધી શકે.