મુખ્યમંત્રી ભૂપેન્દ્ર પટેલે સીમંધર સ્વામી અને દાદા ભગવાનની આરતી ઉતારી, આત્મજ્ઞાની દીપકભાઈના આશીર્વાદ લીધા. મુખ્યમંત્રી ભૂપેન્દ્ર પટેલે આજે ગુજરાતના મોરબી ખાતે આયોજિત દાદા ભગવાનની ૧૧૮મી જન્મજયંતિ મહોત્સવમાં સહભાગી બની ધન્યતા અનુભવી હતી.

મહોત્સવમાં મુખ્યમંત્રીશ્રીએ વિશેષ હાજરી આપી હતી. તેમણે પવિત્ર ભાવ સાથે સીમંધર સ્વામી અને દાદા ભગવાનની આરતી ઉતારી હતી. આ અવસરે મુખ્યમંત્રીએ રાજ્યના અને સૌના કલ્યાણની ભાવના સાથે પ્રાર્થના કરી હતી, જેણે વાતાવરણમાં આધ્યાત્મિકતાનો સંચાર કર્યો હતો.

આ પ્રસંગે મુખ્યમંત્રી ભૂપેન્દ્ર પટેલે આત્મજ્ઞાની દીપકભાઈને હાર પહેરાવી તેમના આશીર્વાદ મેળવ્યા હતા. દીપકભાઈએ પણ મુખ્યમંત્રીને સ્મૃતિ ભેટ સ્વરૂપે દાદા ભગવાનના જીવન પર આધારિત ‘જ્ઞાની પુરુષ પુસ્તક ભાગ-૬’ અર્પણ કર્યું હતું. મુખ્યમંત્રીની આ ધાર્મિક કાર્યક્રમમાં ઉપસ્થિતિએ રાજ્ય સરકારના સંસ્કૃતિ અને આધ્યાત્મિક મૂલ્યો પ્રત્યેના આદરને દર્શાવ્યો હતો.