ગોવા અને એમેઝોનની સમાનતાથી લઈને સાંસ્કૃતિક પ્રતિનિધિત્વ સુધી – ઓપનિંગ ફિલ્મની ટીમે ખોલ્યા શૂટિંગના રહસ્યો

ગોવા ખાતે ચાલી રહેલા 56મા IFFIમાં ઓપનિંગ ફિલ્મ ‘ધ બ્લુ ટ્રેઇલ’ના કલાકારો અને ક્રૂએ ફિલ્મના સ્ક્રીનિંગ બાદ મીડિયા સાથે વિશેષ વાતચીત કરી હતી. આ ફિલ્મ ટેરેસાની આત્મ-શોધ (Self Discovery) ની યાત્રા પર આધારિત છે, જેને પ્રેક્ષકો તરફથી જબરદસ્ત પ્રતિસાદ મળ્યો છે. પ્રેસ કોન્ફરન્સ દરમિયાન, ફિલ્મના દિગ્દર્શક ગેબ્રિયલ મસ્કારોએ એક રસપ્રદ ખુલાસો કર્યો હતો. તેમણે જણાવ્યું કે જ્યારે તેઓ પટકથા લખી રહ્યા હતા ત્યારે લોકેશન અંગે અસમંજસમાં હતા. પરંતુ ગોવાની મુલાકાત લીધા બાદ તેમને લાગ્યું કે ગોવા અને બ્રાઝિલનું એમેઝોન ક્ષેત્ર ઘણું સમાન છે. તેમણે ઉમેર્યું કે, “હું ગોવા પોલીસની શૈલીથી થોડો પ્રેરિત થયો હતો.”

ફિલ્મમાં એમેઝોન સંસ્કૃતિનું પ્રતિનિધિત્વ કરતી અભિનેત્રી રોઝા માલાગુએટાએ ગર્વથી કહ્યું કે, “હું બે સંસ્કૃતિઓનું મિશ્રણ છું – દેશી અને બ્લેક કલ્ચર. આ ફિલ્મ દ્વારા હું મારી તે જ સંસ્કૃતિને રજૂ કરી રહી છું.” બીજી તરફ, સાઉન્ડ ડિઝાઈનર મારિયા એલેઝાન્ડ્રાએ દિગ્દર્શકની સાઉન્ડ પ્રત્યેની ઝીણવટભરી દ્રષ્ટિના વખાણ કર્યા હતા. ફિલ્મના પ્રીમિયરને દર્શકોએ તાળીઓના ગડગડાટથી વધાવી લીધું હતું, જે સાબિત કરે છે કે ટેરેસાની આ સાહસિક સફર લોકોના દિલ જીતવામાં સફળ રહી છે.