મક્કા-મદીના હાઇવે પર ડીઝલ ટેન્કર સાથે બસ અથડાતાં ગમગીની; PM મોદી, વિદેશ મંત્રીએ શોક વ્યક્ત કર્યો

આજે વહેલી સવારે સાઉદી અરેબિયામાં મક્કાથી મદીના જઈ રહેલી એક પેસેન્જર બસ ડીઝલ ટેન્કર સાથે અથડાતાં અનેક ભારતીય ઉમરાહ યાત્રાળુઓના કરૂણ મોત થયાની આશંકા છે. આ દુર્ઘટના મુફ્રીહત નામના સ્થળે રાત્રે લગભગ 1.30 વાગ્યે બની હતી, જેમાં મહિલાઓ અને બાળકો સહિતના પીડિતોનો સમાવેશ થાય છે. પ્રધાનમંત્રી નરેન્દ્ર મોદીએ આ ઘટના પર ગહન શોક વ્યક્ત કર્યો છે અને મૃતકોના પરિવારો પ્રત્યે સંવેદના પાઠવી છે. તેમણે ખાતરી આપી છે કે રિયાધમાં દૂતાવાસ અને જેદ્દાહમાં કોન્સ્યુલેટ જનરલ શક્ય તમામ સહાય પૂરી પાડી રહ્યા છે. વિદેશ મંત્રી ડૉ. એસ. જયશંકરે પણ દુઃખ વ્યક્ત કરતાં કહ્યું કે પ્રભાવિત નાગરિકો અને પરિવારોને સંપૂર્ણ મદદ કરવામાં આવી રહી છે. તેલંગાણાના મુખ્યમંત્રી એ. રેવંત રેડ્ડીએ શોક વ્યક્ત કરતાં જણાવ્યું કે મૃતકોમાં હૈદરાબાદના ઘણા મુસાફરો હતા. હૈદરાબાદમાં રાજ્ય સચિવાલયમાં પીડિત પરિવારોની મદદ માટે કંટ્રોલ રૂમ પણ સ્થાપિત કરવામાં આવ્યો છે, જેના નંબર 91 79979 59754 અને 99129 19545 છે