પ્રધાનમંત્રી નરેન્દ્ર મોદી આજે પશ્ચિમ બંગાળની મુલાકાત લેશે, જ્યાં તેઓ રાજ્યના ઈન્ફ્રાસ્ટ્રક્ચરને મજબૂત કરવા માટે 3,200 કરોડથી વધુના વિકાસલક્ષી પ્રોજેક્ટ્સનું ખાતમુહૂર્ત અને ઉદ્ઘાટન કરશે. આ મુલાકાત બંગાળના પરિવહન ક્ષેત્ર માટે પરિવર્તનકારી સાબિત થશે.

નેશનલ હાઈવે 34 પર મહત્વપૂર્ણ કામગીરી

પ્રધાનમંત્રી નદિયા જિલ્લાના રાણાઘાટ ખાતે એક વિશેષ કાર્યક્રમમાં ભાગ લેશે. તેઓ રાષ્ટ્રીય ધોરીમાર્ગ-34 ના 66.7 કિલોમીટર લાંબા બરજાગુલી-કૃષ્ણનગર વિભાગના ફોર-લેન કામનું લોકાર્પણ કરશે. આ સાથે જ, ઉત્તર 24 પરગણા જિલ્લામાં બરાસાતથી બરજાગુલી સુધીના 17.6 કિલોમીટર લાંબા માર્ગને ફોર-લેન બનાવવા માટે શિલાન્યાસ પણ કરશે.

આ નવા હાઈવે પ્રોજેક્ટ્સ કોલકાતા અને સિલિગુડી વચ્ચેના જોડાણને અત્યંત સુગમ બનાવશે. આ માર્ગ તૈયાર થવાથી મુસાફરીના સમયમાં અંદાજે બે કલાકનો મોટો ઘટાડો થશે. આ પ્રોજેક્ટ્સ માત્ર પરિવહન જ નહીં, પરંતુ પ્રદેશના પ્રવાસન અને આર્થિક વિકાસને પણ નવી ગતિ આપશે.