પ્રધાનમંત્રી નરેન્દ્ર મોદીએ આજે ઉત્તરાખંડ રાજ્યની સ્થાપનાના રજત જયંતી સમારોહમાં હાજરી આપી હતી. આ પ્રસંગે તેમણે રાજ્ય માટે 8,000 કરોડ રૂપિયાથી વધુના વિવિધ વિકાસ પ્રોજેક્ટ્સનું ઉદ્ઘાટન અને શિલાન્યાસ કર્યું હતું. આ પ્રોજેક્ટ્સ પીવાનું પાણી, સિંચાઈ, ટેકનિકલ શિક્ષણ, ઉર્જા, શહેરી વિકાસ, રમતગમત અને કૌશલ્ય વિકાસ જેવા મહત્વના ક્ષેત્રોને આવરી લે છે, જે રાજ્યના સર્વાંગી વિકાસને વેગ આપશે.

સિંચાઈ, પાણી અને અન્ય મુખ્ય યોજનાઓ

પીએમ મોદીએ સોંગ ડેમ પીવાના પાણીનો પ્રોજેક્ટ અને નૈનીતાલમાં જામરાની ડેમ બહુહેતુક પ્રોજેક્ટ જેવા બે મુખ્ય જળ ક્ષેત્રની યોજનાઓનો શિલાન્યાસ કર્યો હતો. અન્ય ઉદ્ઘાટિત પ્રોજેક્ટ્સમાં અમૃત યોજના હેઠળ દહેરાદૂન પાણી પુરવઠા સુવિધા, પિથોરાગઢમાં વીજળી સબસ્ટેશન, સરકારી ઇમારતોમાં સૌર ઉર્જા પ્લાન્ટ અને હલ્દવાની સ્ટેડિયમ ખાતે એસ્ટ્રોટર્ફ હોકી મેદાનનો સમાવેશ થાય છે. પ્રધાનમંત્રીએ PM પાક વીમા યોજના હેઠળ 28,000થી વધુ ખેડૂતોના બેંક ખાતાઓમાં 62 કરોડની સહાય પણ ટ્રાન્સફર કરી. તેમણે લાભાર્થીઓ સાથે સંવાદ કર્યો, એક પ્રદર્શનનું અવલોકન કર્યું અને આ ઐતિહાસિક દિવસની યાદમાં સ્મારક ટપાલ ટિકિટ પણ બહાર પાડી.